Home

كتاب كلب المعمل هو رواية للكاتب إبراهيم البجلاتي.

إبراهيم البجلاتي دكتور مسالك بولية، بصراحة كان لازم المعلومة دي تكون على الغلاف لأن دي مش رواية ده كتاب مسالك بولية، وأنا لو كنت أعرف إن الموضوع فيه مسالك بولية مكنتش اشتريت الكتاب، وأنا أُلفت النظر إلى المسالك البولية لأنك عندما تقرأ الكتاب لن تستطيع الهرب لا من المسالك ولا من البول والدم اللي هيغرقك وأنت بتقرأ.

الكاتب يستعرض معلوماته الطبية في المسالك البولية والجراحة اللي أكيد تعب وضيع فيهم 7 سنين في كلية الطب فجاي يقرفنا بقى بتفاصيل طبية ليس لها أي علاقة بالرواية، والجزء الإنساني في الرواية اللي المفروض معظم الناس هتفهمه مش مركز عليه بشكل كبير.

ثم إن في بعض الناس من أمثالي مش بيحبوا البول ولا الدم ولا العمليات ولا الدكاترة أصلا بس الكاتب هيحشر الموضوع ده في زورك لأنه مختار البطل بتاع الرواية دكتور مسالك بولية تقريبا الرواية مستوحاة من قصته هو ولا حاجة اللي كان لازم يقرفنا بيها ولسوء الحظ لقى حد ينشرله الكلام ده.

التركيز التاني للكاتب كان على أماكن في مدينة المنصورة، المشكلة أنه يتعامل مع الأماكن دي كأن القارئ يعرفها بالفعل، يا سيدي أنا لم أعش في المنصورة زيك ولا حتى روحتها زيارة، ليه التركيز المبالغ فيه على تفاصيل المدينة والشوارع والأماكن؟!.

الجزء الجيد الوحيد في هذه الرواية هو المواقف الأخيرة بين البطل والأستاذ وبصراحة هذا الجزء لم يستمر كثيرا لأن الكاتب رجع يتكلم تاني عن المسالك البولية ثم انتهى الكتاب.

الحمد لله إن الكتاب انتهى.

عادة أفضل العمل بحديث من كان يؤمن بالله واليوم الآخر، فليقل خيرا أو ليصمت، ولكن أنا دفعت فلوس وقضيت وقتا في قراءة هذا الكتاب فمن حقي أن أكتب رأيّ فيه.