Home

مسلسل أعلى نسبة مشاهدة هو مسلسل من 15 حلقة عُرض في النصف الأول من شهر رمضان لسنة 2024.

المسلسل ظريف ومسلي تابعته في النصف الأول من رمضان، بدايته بطيئة نسبيا وقصته لطيفة. الشخصيات في بداية المسلسل مش هتشدك أوي، خصوصا جو الصعبانيات ده اللي في الأول بس بعد كده الأحداث بتشد بسرعة وهتبقى متحمس تشوف ايه اللي اللي هيحصل.

عجبني إن كتابة الشخصيات حقيقية بدرجة كبيرة، فغالبا اللي كان بيكتب كان عارف تفاصيل النوعية دي من الشخصيات كويس، فأحب أحييه.

الوحش بقى إن على آخر المسلسل الكاتب كان عايز يحط شخصية البطلة في المأزق الأساسي في المسلسل اللي هو قضية الاتجار بالبشر، فعشان يعمل كده خلى شخصية زي طارق متردش على كاميليا لأسباب غير مفهومة عشان يكمل الكماشة على بطلة المسلسل ويزقها في الاتجاه اللي هو عايزه، وده كان غريب ووحش في العموم.

أحمد بدير بقى في صورة قاضي كان مضحك جدا، ومشهد المحكمة في آخر حلقة برضو مضحك جدا وجو صعبانيات بقى وبتاع، وعامة الكاتب تقريبا معرفش يقفل الدنيا إزاي فعك الدنيا في آخر حلقتين، بس غير كده مسلسل ممتع، مش المسلسل اللي لازم تشوفه، بس لو عايز تتفرج على حاجة ممكن أرشحه.